2018 шықәса рзы Аԥснытәи ашколқәа ирылгеит 1889-ҩык аушьҭымҭацәа. Лакоба ихьӡ зху Аҟәатәи Ашьхаруаа рышкол № 10 аҟны традициала аныҳәатә уснагӡатәқәа ирылагеит аҳәынҭқарратә бираҟ ашьҭыхрала. Ашкол адиректор Аида Кәарҷелиаԥҳа аушьҭымҭацәа дрыдныҳәало ирзеиӷьалшьеит ақәҿиарақәеи аманшәалареи. Александр Пушкин ихьӡ зху ашкол № 2 аҟынгьы ашҭа иҭыҩуан амузыка, ашәақәа, еилаӡҩон аччаԥшьи алаӷырӡи. Игон аҵыхәтәантәи аҵәҵәабжьы, ажәҩан иалалон еиуеиԥшым аԥшшәхәқәа змоу анкьапышҭарчқәа.