АҞӘА, рашәара 13 – Sputnik, Бадраҟ Аҩӡба. Иахьатәи аамҭазы аиҵастанциақәа рҟны ашәарҭадара рыӷәӷәоуп иҳәеит Sputnik аинтервиу азҭаз афымцаргыларақәа Аҟәатәи аусбарҭа аиҳабы Ҭимур Џьынџьал.
Зынӡак Аҟәа ақалақь аҿы аус руеит 326 еиҵастанциа. Бжьаратәла дара ԥшьба-ԥшьба шәы рҿоуп. Ашәарҭадараз аусурақәа мҩаԥган 60 рҟны.
"Ҳара аиҵастанциақәа рышәқәа ҳарӷәӷәеит, асаԥаҭқәа ҿаҳҵеит. Есымза игәаҭаны ҳахысуеит урҭ асаԥаҭқәа ԥҽу иԥҽыму ҳәа", — иҳәеит аусбарҭа аиҳабы.
Џьынџьал иажәақәа рыла зны-зынла аҭыԥантәи ауааԥсыра хаԥышәала урҭ ашәқәа аадыртуеит, афымца аиԥҟьараан.
"Аҵыхәтәантәи аамҭақәа ирылагӡаны ашәқәа ԥшьба ԥырҽхьан. Ҳара ԥхьаҟагьы агәаҭарақәа мҩаԥаагалоит", — иҳәеит иара.
Аҭыԥ змаз арыцҳара ашьҭахь 250 саԥаҭ аиҵастанциақәа ирҿаҵан.
"Иажәхьаз асаԥаҭқәа аҿыцқәа рыла иҳаԥсахуан. Ашәқәа ахьыуашәшәыразгьы аҿыцқәа рыла иҳаԥсахуан, аҩныҵҟа аӡәгьы аҩналара илымшарц", — иҳәеит Џьынџьал.
Ақалақь ауааԥсыра иҟоу аҭагылазаашьа ҵоураны иахәаԥшуеит. Иара убри аан иазгәарҭоит афымцацәаҳәақәа рҭагылазаашьагьы азхьаԥшра шаҭатәу.
2018 шықәса жәабранмзазы жә-шықәса зхыҵуаз ахәыҷы аток исит иаркымыз атрансформатортә аиҵастанциаҿ. Ахәыҷы аамҭақәак рышьҭахь иԥсҭазаара далҵит.