АҞӘА, рашәара 14 – Sputnik, Бадраҟ Аҩӡба. Аԥсны иаҭаар зҭаху асасааирҭақәа алырхыр рылшоит аминистрра аофициалтә саит аҟны ҳәа иҳәеит Аԥсны акурортқәеи атуризми рминистр ихаҭыԥуаҩ Асҭамыр Ахба Sputnik аинтервиу аҭо.
"Ҳара асаит ахь иҭаҳҵоит ареспублика асасааирҭақәа рзы адыррақәа атуристцәа имшәа-имырҳа Аԥсныҟа иааларц", — иҳәеит иара.
Аԥсшьарҭа ҩнқәа, асасааирҭақәа, асанаториақәа уҳәа рзы аинформациа аиуразы атуристцәа иаадыртыроуп аминистрра асаит аҟәша "Атуристтә портал". Уа иԥшаатәуп апункт "Анырхара". Асҭамыр Ахба иажәақәа рыла аҟәша аамҭа-аамҭала ихадырҭәаауеит. Атуристцәа ирылшоит еиҳа ирнаало аҭыԥ алхра. Убри аан урҭ ржьап ҳәа ашәарҭара ыҟам.
Аминистр ихаҭыԥуаҩ иҳәеит ааигәа аотелиерцәеи рԥылараан ишалацәажәоз атуристцәа ршәарҭадара азҵаара.
"Аԥаршеи саитқәа аԥҵаны ауаа иҟам-ианым анхарҭа ҭыԥқәа ирыдрыԥхьалоит. Амцҳәаҩцәа амҩа рымҭара хықәкны иҟаҵаны аҳәара ҟаҳҵеит асасааирҭақәа рахь аофициалтә саитқәа аԥырҵарц, урҭ аситқәа иаку ареестр ахь иҭаагаларц азы", — иҳәеит Асҭамыр Ахба.