АҞӘА, ԥхынгәы 2 – Sputnik. Ҳаспортсменцәа Туааԥсеинтәи Аԥсныҟа иааргеит ахьтәы медалқәа ԥшьбеи аразны медалқәа ҩбеи ҳәа радио Sputnik Аԥсны иазеиҭеиҳәеит ареспублика апрофессионалтә бокс азы Афедерациа апрезидент Алик Карди оглы.
"Ҳара атурнир ҳҽазышәаны ҳҽазыҟаҳҵон. Ҳҽазыҟаҵарақәа алҵшәақәа аадырԥшит. Быжьҩык ҳаспортсменцәа рҟынтәи ԥшьҩык актәи аҭыԥқәа ааныркылеит, ҩыџьа – аҩбатәи", — ҳәа еиҭеиҳәоит Карди оглы.
Атурнир алахәхаразы иреиӷьқәаз алыркаауан, аха асеиԥшҵәҟьа шьахәла иқәгылап ҳәа ҳақәгәыӷуамызт иҳәоит иара.
Актәи аҭыԥқәа ааныркылеит: Анри Аршба, Леон Абӷаџьаа, Баграт Ҭаниа, Саир Каҷараа. Аҩбатәи- Георги Гогохьиеи Ашот Барцикиани.
Азыҟаҵаҩ иажәақәа рыла ауадаҩра рыцын афиналтә турнирқәа.
Абокси, ақәԥареи, атлетика хьанҭеи рзы аҟәатәи ахәыҷы-қәыԥштә школ ааӡамҭацәа рхы аладырхәит Туаԥсеи имҩаԥысуаз, ақалақь 180 шықәса ахыҵра иазкыз атурнир.
Абокс азы атурнир мҩаԥысуан рашәара 29 инаркны ԥхынгәы 1 аҟынӡа.