АҞӘА, ԥхынгәы 16 — Sputnik. Ашьапылампыл азы Урыстәыла еизгоу акоманда азыҟаҵаҩ хада Станислав Черчесов анемец ҭыжььымҭа Spiegel аинтервиу анаиҭоз, ажурналист акыр иҽазишәон адопинг азы аимак-аиҿак амҩаԥгара. Убри инадҳәаланы Черчесов анемец журналист иинтервиу еиԥиҟьеит ҳәа аанацҳауеит Р-Спорт.
Аиҿцәажәараан ажурналист амилаҭтә команда антидопингтә ԥҟарақәа еиланагоу еиланамгоу азҵаара алацәажәара иҽазишәеит.
Иара иажәақәа рыла, акоманда алшарақәа ус шакәу унарбоит.
Черчесов уи аҭакс иазгәеиҭеит акоманда ахәмарыҩцәа хәмаррацыԥхьаӡа ишгәарҭоз.
Ажурналистцәа уи аҭак ҭкааны ирбомызт. Черчесов иакәзар иарбанызаалак ишьаҭарку ҿырԥшык ааргарц аҳәара ҟаиҵеит.
Ажурналистцәа "Рубин" ахьчаҩ Руслан Камболов иӡбахә рҳәеит. Иара 2015 шықәса рзы ишьа дексаметазон шалаз шьақәдыргылеит. Аха ишьақәырӷәӷәан уи уаанӡа аҽыхәышәтәразы ишидикылоз. WADA аԥҟарақәа уи мап ахырҳәаауам. ФИФА аспортсмен хара имам ҳәа иаԥхьаӡеит.
Абри ашьҭахь азыҟаҵаҩ аинтервиу еиԥиҟьан дгылан дцеит.
ЧМ-2018 иалалхәыз аспортсменцәа ргәаҭарақәа иаадмырԥшит адопинг ахархәара.
ФИФА амаӡаныҟәгаҩ хада Фатма Самура ишылҳәаз ала ашьапылампыл аҿы адопинг ахархәара 0,1 процент роуп ишьақәнартәо.