АҞӘА, ԥхынгәы 18 — Sputnik. Илеиз ақәыршы иахҟьаны Аҟәа ақалақь амҩадуқәа реиҳарак аӡы рнылеит, анхацәа аԥхасҭа роуит, абри атәы Sputnik акорреспондент изеиҭеиҳәеит Аԥсны аҭагылазаашьа ҷыдақәа рзы аминистрра аоперативтә ҷаԥшьаҩы Араик Каленџьиан.
"Ақалақь агәҭа ақәа ӷәӷәаны илеит, аха амашьынақәа рныҟәара аанымгалеит, ауааԥсыра аԥхасҭа роуит, аха ҳацхыраара рҭахымхеит", — иҳәеит иара.
Араик Каленџьиан иажәақәа рыла Ҷанба имҩаду аҟнытәи анхацәа рыҩнқәа аӡы рыҵалеит ҳәа АҶА ашҟа аҭел иасуеит.
"Аӡиас Беслетка хыҵны, ауаа рыҩнқәа ирыҩналеит. Ҳусзуҩцәа уахь инеихьеит ацхырааразы. Макьаназы ҳара иаадкыланы иҳазҳәом шаҟа ҩны аԥхасҭа роуыз", — иҳәеит Каленџьиан.
Ԥхынгәы 18, ашьыжь излагаз ақәыршҩы иахҟьаны амҩадуқәа Титова, Дбар, Ҷанба, Аиааира, Аҩардан, Аԥсны аминистрцәа реилазаара ахыбра азааигәара анхацәа аӡы рыҵалеит, рыҩнқәа аԥхасҭа анаҭеит.