АҞӘА, нанҳәа 29 — Sputnik. МИА "Россия сегодня" арҵаратә программақәа рнапхгаҩы Олег Шьчедров илекциа ("Как рассказать историю, чтобы ей заинтересовались современные медиа/Как сделать ваши новости популярными") мҩаԥысраны иҟоуп Аҟәа, Sputnik апресс-центр аҿы.
Амастер-класс алахәылацәа ирзеиҭарҳәараны иҟоуп ажәабжь адгалашьа, аелектронтә материал ақьаад иану излеиԥшым, иарбан тексту еиҳа ирыдыркыло.
Олег Шьчедров SputnikPro аҿы дықәгылахьеит Ермантәыла, Белоруссиа, Кыргызстан, Молдова.
Иара иажәақәа рыла XXI ашәышықәсазы ауаа аинформациа рацәа роуеит, ироуеит еиуеиԥшым аҭыԥқәа рҟынтәи. Убри инадҳәаланы ажурналист иҿаԥхьа иқәгылоу адҵақәа уадаҩхоит.
"Аԥхьатәи ацәаҳәақәа инадыркны аԥхьаҩ дзыԥхьо аинтерес икыроуп", — иҳәеит Шьчедров.
Олег Шьчедров – МИА "Россия сегодня" арҵаратә программақәа дырнапхгаҩуп.
2002 – 2003 шықәсқәа рзы "Интерфакс" аредактор хада.
2004 – 2010 шықәсқәа рзы аинформациатә маҵзура Reuters акорреспондент. Ажурналистика инапы алакуижьҭеи 29 шықәса ҵуеит.