АҞӘА, цәыббра 6 – Sputnik. Аҧсны Аҳəынҭқарра Ахада Рауль Ҳаџьымба Шьамтəылатəи Арабтə Республикаҿ иҟоу Урыстәылатәи Афедерациа Ацҳаражәҳәаҩ Александр Киншьак диԥылеит, абри атәы Sputnik иазеиҭалҳәеит Рауль Ҳаџьымба ипресс-маӡаныҟәгаҩ Наала Аҩӡԥҳа.
Александр Киншьак Рауль Ҳаџьымба идныҳәалеит Урыстәыла Аԥсны азхаҵара жәа-шықәса ахыҵра. Иара убасгьы иазгәеиҭеит русуратә ныҟәара иамоу аҵак ду.
Александр Киншьак иҳәеит Шьамтәыла Аԥсны Ахада инеира даара гәыкала ишрыдыркылаз. Иара иҳәеит дшазыхиоу ԥхьаҟазы Аԥсны Ацҳаражәҳәарҭа Шьамтәыла аартра аус ацхраара азура.
Аԥсны Ахада Ацҳаражәҳәаҩ ҭабуп ҳәа иеиҳәеит.
Шьамтәыла Аԥсны Аҳәынҭқарра ахьыԥшымра шазханаҵаз рыланаҳәеит 2018 шықәса, лаҵара 29 рзы.
Цəыббрамза 4 рзы Аҧсны Аҳəынҭқарра Ахада Рауль Ҳаџьымба официалтə ныҟәарала Шьамтəылатəи Арабтə Республика даҭааит.
Аҧсны Аҳəынҭқарра Ахада напхгара ззиуа аделегациа аилазаараҿы иҟоуп: Аҧыза-министр Геннади Гагəылиа, Ахада Иусбарҭа анапхгаҩы Беслан Барцыц, Ашəарҭадара Ахеилак амаӡаныҟəгаҩ Муҳаммед Кьылба, Адəныҟатəи аусқəа рминистр Даур Ақаҩба, Атəылахьчара аминистр Мираб Қьышьмариа, Аекономика аминистр Адгəыр Арӡынба.