АҞӘА, жьҭаара 3 – Sputnik, Бадраҟ Аҩӡба. Афонд "Аидгылара ацҳа", зусура Аԥсни Ҭырқәтәыла иҟоу аԥсуа диаспореи реидҳәалара иазырхоу аадыртит жьҭаара 1 азы Аҟәа. Абри атәы аалыцҳаит афонд ашьаҭаркыҩцәа руаӡәк, Елена Лабахәуаԥҳа.
"Адиаспора ахәҭак Аԥсны инхоит, Ҭырқәтәыла иҟоуп Ҭырқәтәыла иҟоу кавказтәи аилазаара Афедерациеи Аԥсуа Федерациеи, Аԥсны ауаажәлари Ҭырқәтәыла адиаспореи еидызҳәало аиҿкаарақәа", — лҳәеит лара
Арҭ аиҿкаарақәа ирхықәкы хаданы иҟоуп Аԥсни Ҭырқәтәыла иҟоу аԥсуа диаспореи реидҳәалара лҳәоит Лабахәуаԥҳа.
"Иазыԥхьагәаҭоуп ашколхәыҷқәа реимдара, астудентцәа реимдара, алагерқәа реиҿкаара. Арҭ Афедерациақәа абри ахырхарҭала акрааҵуеит аус руеижьҭеи", — лҳәеит лара.
Ацентр аусура акоординациа мҩаԥнагалоит ҳәа азгәалҭеит лара.
"Асеиԥш иҟоу ацентрқәа аус руеит Маиҟәаԥи Нальчики", — лҳәеит аиҿкааҩ.
Ацентр аартраан ирыларҳәеит ахьиратә дизаин акурсқәа раартра.
Аԥснытәи аҳәынҭқарратә университет аҟазаратә ҟәша астудентцәеи арҵаҩцәеи рзы имҩаԥгахоит мызктәи акурсқәа ацәамаҭәа атрадициатә методқәа рыла ахыркра ахьыддырҵо. Акурсқәа аусура иалагоит жьҭаара 3 рзы.
Афонд аӡыргараан имҩаԥысит ашәҟәыҩҩы Ҳаири Қәыҭарба амҳаџьырра иазку атрилогиа "Меня сослали", "Даже в жаркой пустыне", "Если тебя сослали в жаркую пустыню, то тебе все равно холодно" аӡыргара.