АҞӘА, жьҭаара 16– Sputnik, Сариа Кәарацхьелиаԥҳа. Европеи СССРи рчемпион, жәларбжьаратәи акласс аспорт азҟаза Рашь Хәытаба ихьӡ зху XXV жәларбжьаратәи атурнир мҩаԥысуеит Гәдоуҭа жьҭаара 16-17 рзы, ҳәа радио Sputnik иазеиҭеиҳәеит зых иақәиҭу ақәԥаразы Аԥсны еизго акоманда азыҟаҵаҩ Џьарназ Бениа.
"Атурнир иалахәуп Гагра, Тҟәарчал, Аҟәа, Гал, Очамчыра, Гәдоуҭа, Нхыҵ-Кавказ, Тула, Краснодар, Ахыҵ Уаԥстәыла, Шәача, Адыгатәыла ркомандақәа. Алахәылацәа рыкапан 65 — 125 килограмм инаӡоит. Атурнир актәи амш азы иқәгылеит 100-ҩык инареиҳаны аспортсменцәа", — ҳәа иҳәоит Бениа.
Рашь Хәытаба ихьӡ зху раԥхьатәи атурнир мҩаԥысит 1992-1993 шықәсқәа рызтәи аџьынџьтәылатә еибашьра ашьҭахь. Нас маҷ-маҷ иара аҽарҭбаауа иалагеит.
Европеи СССРи рчемпион, жәларбжьаратәи акласс аспорт азҟаза Рашь Хәытаба иахьа Аԥсны зых иақәиҭу ақәԥараз Афедерациа дахагылоуп.