АҞӘА, абҵара 12 – Sputnik, Бадри Есиава. Аԥснытәи аспортсмен Енри Агрба еилаԥсоу ақәԥарахк аҿы аԥыжәара игеит FCF-MMA аверсиала имҩаԥысуаз атурнир аҿы ҳәа Sputnik акорреспондент изеиҭеиҳәеит иазыҟаҵаҩ Асҭамур Арсҭаа.
"Енри ҩынтә дықәгылеит. Актәи ақәгылараан Индиатәи аспортсмен диандаҭлон. Аиааирагьы игеит. Афинал аҿы Кыргызстантәи аспортсмен, самбо азы адунеи ачемпионат диндаҭлон. Уи ақәгылара акыр ишыуадаҩызгьы Енри еиҭах аиааира игеит", — ҳәа еиҭеиҳәоит иазыҟаҵаҩ.
Азыҟаҵаҩ иажәақәа рыла Енри Агрба иара убасгьы ианаршьеит аԥхьахә: "Атурнир аҿы иреиӷьу ақәгыларазы".
Енри Агрба 23 шықәса ихыҵуеит. Еилаԥсоу ақәԥарахкқәа рыдагьы анапылампыл профессионалла далахәуп. Анапылампыл азы Аԥсны еизгоу акоманда далахәылоуп.
"Енри анапылампыл азы Аԥсны еизгоу акоманда далахәылоуп. Уажәтәи испорт хырхарҭаҿгьы ишыжәбо ала даара ишьахәны ихы ааирԥшит", — иҳәоит азыҟаҵаҩ.
FCF-MMA аверсиала еилаԥсоу ақәԥарахкқәа рзы IX Адунеи ахраҿа агаразы атурнир мҩаԥысуан абҵара 10 — 11 рзы Кисловодск. Уи иалахәыз аԥсуа спортсмен аиааира игеит.