АҞӘА, абҵара 15— Sputnik. Иапониа аԥыза-министр Синдзо Абе иҳәеит агәыӷра шимоу Урыстәылеи Иапониеи рҵакыратә еимак аӡбара рылшап ҳәа. Абе аҭынчраз аиқәшаҳаҭра анапаҵаҩра шалшо агәрагара имоуп ҳәа аанацҳауеит РИА Новости.
"Агәреибагара ҵаҵӷәыс иҟаҵаны ҳҵакырадгьылтә еимак ҳаӡбап ҳәа сыҟоуп. Путини сареи иҳалҳаршароуп иҟоу апроблема аҭыԥ ақәҵара. 70 шықәса аӡбара змауз апроблема уаҵәтәи абиԥарақәа рызныжьра иаԥсам", - иҳәеит иара.
Путини Абеи реиԥылара мҩаԥысит Сингапур, Алада-Мрагыларатәи Азиа атәылақәа Рассоциациа иалоу аҳәынҭқаррақәа рсаммит аартраан.
Иапониа адгьылбжьахақәа Кунашир, Шикотан, Итуруп, Хабомаи иара иатәны иаԥхьаӡоит. Иапониа урҭ рырхынҳәра ихадоу акәны иаԥхьаӡоит Урыстәылеи иареи рыбжьара аҭынчраз аиқәшаҳаҭра анапаҵаҩраан.
1956 шықәса рзы Асовет Еидгылеи Иапониеи рнапы аҵарҩит Аицдекларациа. Уаҟа Москва ақәшаҳаҭхеит адгьылбжьахақәа Хабомаии Шикотани Иапониа аҭара азҵаара ахәаԥшра. Иара убри аан Кунашири Итурупи рыӡбахә иалацәажәамызт. СССР агәаанагарала, абри адокумент аимак еилнаргар акәын. Иапониа акәзар, адокумент апроблема аӡбра иахәҭакны иахәаԥшуан.
Уаанӡа Владимир Путин ажәадгала ҟаиҵахьан иҷыдоу аҭагылазаашьақәа ирыхьмырԥшыкәа Токиои Москвеи аҭынчраз аиқәшаҳаҭра рыбжьарҵарц.