АҞӘА, абҵара 14 — Sputnik. Москва агәыӷра ду анаҭоит Алада-Мрагыларатәи Азиатәи аҳәынҭқаррақәа Рассоциациа (АСЕАН) аус ацура иҳәеит Владимир Путин Сингапур имҩаԥысуаз асаммит аҿы иқәгылараан ҳәа аанацҳауеит РИА Новости.
Урыстәыла ахада иазгәеиҭеит 2016 шықәса рзы Шәача имҩаԥысуаз аиԥылараан ишрыдкылаз аусуратә плани адекларациеи. Арҭ адокументқәа хықәкны ирыман Урыстәылеи АСЕАНи стратегиатә партниорцәаны рыҟазаара.
"Уиижьҭеи ицаз аҩышықәса рыҩныҵҟа ҳара иҳалшеит имаҷымкәа аус рацәа аура: аполитикатә диалог арцыхцыхра, Джакарта ақалақь аҿы АСЕАН аҟны Урыстәыла ахаҭарнакра аартра. Ҳара еиуеиԥшым апроблемақәа рызнеишьаҿ ҳажәа еиуршәаны иаҳҳәоит, атерроризм аҿагылараҿы аус еицаауеит, анаркотрафик, еиҿкааралатәи ацәгьоура аԥҳарҟәҟәаауеит", - иҳәеит иара.
Атәыла ахада иазгәеиҭеит аҳәынҭқаррақәа рыдәныҟатәи аусқәа рминистрцәа есышықәса ишеиқәшәо, Урыстәыла атәылахьчара аминистр АСЕАН атәылахьчара аминистрра аилацәажәарақәа дышрылахәу, аҩныҵҟатәи аусқәа рминистр АСЕАН амилаҭтә полициа Рассоциациа аконференциақәа дышрылахәу.
Аганқәа хықәкыла еиздырҳауеит аекономикатә еимадарақәа. Ҵыԥхтәи ашықәс иаҿырԥшны Урыстәылеи ассоциациеи ртауареикәыршара 35% иазҳаит, аинвистициақәа рхышәа-ҵышәа акәзар 25 миллиард доллар иеиҳахеит.
"Ақалақь аҿы ацифратә технологиақәа рхархәаразы Москва атәылаҿ аԥыжәара амоуп. Уажәы Сингапури Москвеи ҩ-ганктәи ашьаҭала абри аусхк аҟны аусеицура мҩаԥыргоит. Сгәы иаанагоит ҳаинырра агеографиа еиҳа-еиҳа аҽарҭбаалап ҳәа", - иҳәеит Путин.
Иажәа хыркәшо атәыла ахада АСЕАН аофициалтәи анаплакытәи напхгара ааԥхьара риҭеит Петербургтәи аекономикатә форум "ВЭФ-2019" ахь.
АСЕАН шьаҭаркын 1967 шықәса рзы. Иара иалахәылоуп: Брунеи, Вьетнам, Индонезиа, Камбоджа, Лаос, Малаизиа, Мианма, Сингапур, Таиланд, Филиппины.
