АҞӘА, абҵара 20– Sputnik, Асмаҭ Ҵәыџьԥҳа. Ахәыҷтәы хореографиатә ансамбль "Амцабз" актәи аҭыԥ ааннакылеит жәлар рыкәашарақәа рзы Урыстәыла Афедералтә округ Ахраҿа агаразы аиндаҭлараҿ ҳәа ааицҳаит аколлектив анапхгаҩы Лаша Марыхәба Sputnik аинтервиу аҭо.
Аиндаҭлара афиналаҿ "Амцабз" Кавказ жәлар рыкәашарақәа ҩба нанагӡеит: аԥсуа кәашареи даӷьысҭантәи акәашареи.
"Ахәаԥшыҩцәа еснагь еиԥш ибзиаӡаны ҳрыдыркылеит. Аиндаҭлараҿы аҽа 10 коллективтә кавказтәи акәашарақәа нарыгӡон азы аиааира акыр иуадаҩын", - иҳәеит Марыхәба.
Акәашаҩцәа ҿарацәа аиндаҭлара даара ҭакԥхықәрала иазнеиит, аха зегьы ирылымшеит рхы рнапаҿы аагара, даара агәыхыҭхыҭра рыман.
"Ақәгылара ашьҭахь акәашаҩцәа руаӡәк аҳақьымцәа идҳаԥхьалар акәхеит. Нас иара иҳәеит шьыжьы инаркны акгьы шизымфоз, игәы хыҭхыҭуа дшазыԥшыз ақәгылара", - иҳәеит иара.
Жәлар рыкәашарақәа рзы Урыстәыла Афедералтә округ Ахраҿа агаразы аиндаҭлара иалахәын Москва зегь аҟынтәи 1000-ҩык акәашацәа. Аиааира згаз алахәхоит жәлар рыкәашаразы Урыстәыла ачемпионат.