АҞӘА, абҵара 23 – Sputnik. Лондон аполициа урыстәылауаа Александр Петрови Руслан Боширови зну авидео ҿыцқәа цәырыргеит. Арҭ аҩыџьа Сергеии Иулиеи Скрипальраа ахәшәырк рырҭеит ҳәа агәаанагара ыҟоуп. Абри атәы аанацҳауеит РИА Новости.
"Ашьҭаԥшратә камерқәа рҟны иубарҭоуп Александр Петрови Руслан Боширови, иубарҭоуп урҭ Солбсери ишыҟаз хәажәкыра 4 рзы. Адухьҭрагьы афото ҭыхуп", — ҳәа аҳәоит Скотланд-Иард адырраҭараҿы.
Британиатәи амаҵзура ҷыдақәа рыԥшаара иашьҭоуп Сергеии Иулиеи Скрипальраа ахәшә шҳам рырҭеит ҳәа иршьо Александр Петрови Руслан Боширови ирыцхраауаз аҽа ҩыџьа ауааи.
Агәаанагара ыҟоуп Петрови Боширови ацҳаражәҳәарҭаҿ аус зуа акуратор иԥылар алшон ҳәа, аԥшьбатәи ахаҿы, аҳақьым, аоперациа зегьы хылаԥшра аиҭон ҳәа.
Лондон "агенты ГРУ" ҳәа зыхнаҳәааз Петрови Боширови егььырҭ ацәгьоура иалахәын ҳәа агәҩара ззыҟоуи еиԥылар алшон Лондонтәи асасааирҭа City Stay Hotel аҿы рҽанҭарыҩ ашьҭахь.
Сергеии Иулиеи Скрипальраа хәажәкыра 4 рзы Солсбери ашҳам рыҭан. Ахҭыс жәларбжьаратәи ахцәажәара ахылҿиааит. Лондон — иҟалаз Москвоуп изыхҟьаз аҳәеит. Цәыббрамза алагамҭазы Скрипальраа ахәшә рызҭаз ҳәа рыхьӡ рҳәеит — Александр Петрови Руслан Боширови. Москва Лондон ахь ааԥхьара ҟанаҵеит аҽыԥныҳәаҟаҵара аасҭа аусеицурахь ииасырц.