АҞӘА, абҵара 29– Sputnik. Ахәаша, абҵара 30 рзы хәыда-ԥсадатәи акциа аҳәаақәа ирҭагӡаны иаарласны, хатәгәаԥхарала имҩаԥыргоит изҭахны иҟоу ргәабзиара аҭҵаара амобилтә лабораториаҿы. Абри атәы Sputnik акорреспондент илзеиҭалҳәеит Ареспубликатә диспансери СПИД Ацентри рҳақьым хада Натела Тоԥуриаԥҳа.
"Акциа азырхоуп СПИД иаҿагылан ақәԥара амш. Абҵара 30 рзы амобилтә лабораториа амашьына Ареспубликатә хәышәтәырҭа ашҭаҿы иргылахоит асааҭ жәаба инаркны жәиԥшь рҟынӡа. Ареспубликатә диспансери СПИД Ацентри еицымҩаԥыргараны иҟоуп хәыда-ԥсадатәи аекспресс-диагностика агепатитқәа В, С. ВИЧ-инфекциа ргәаҭаразы акциа", - лҳәеит Тоԥуриаԥҳа.
"Изҭаху дааины ихы гәеиҭар алшоит. Ҳмыругақәа зегьы зныктәи хархәароуп ирымоу. Зхы гәазҭаз ауаҩы иҭак аекспресс-методикала илҭоит аԥсихолог. Аҭак зеиԥшрахо еиԥш имҩаԥгахоит иаԥхьаҟатәи игәаҭарақәагьы", — лҳәеит Натела Тоԥуриаԥҳа.