АҞӘА, ԥхынҷкәын 14 — Sputnik. Венесуела ахада Николас Мадуро ԥхынҷкәын 13 рзы ар адҵа риҭеит ихианы иҟазарц. Абри атәы аанацҳауеит РИА Новости.
"Сара арратә мчрақәа зегьы рахь адҵа ҟасҵеит Америка аимпериалисттә гәҭакқәа раԥырҟәҟәаарази аҭынчра адгыларази. Венесуела шәара ишәықәгәыӷуеит", — ҳәа иҩуеит Мадуро Twitter аҿтәи имикроблог аҟны.
Уаанӡа Мадуро ЕАШ ахада амилаҭтә шәарҭадараз ицхырааҩ Џьон Болтон ахара идиҵахьан атәылаҿ аҳәынҭқарратә шьақәгылашьа аҵшәааразы Колумбиа алархәны ауснагӡатәқәа напхгара риҭоит ҳәа. Колумбиа ахада Иван Дуке Мадуро абри аплан далахәылоуп ҳәа изиҳәеит.