"Иура дахьыҟазаалакгьы ихымҩаԥгашьа, иуаҩра, иламыс, ипату акы узазҳәо иҟамызт, ашьац змырҟьацуаз диҩызан. Аӡәы игәы иалсуаз ҟаиҵомызт, иҳәомызт, аҩызара амҩаԥгараҟны вбак иуҭо дыҟамызт. Амузыка аҟны, аҟазараҟны иааԥсара маҷымызт", — иҳәеит Амҷба.
Аԥсны зҽаԥсазтәыз артист, Ахәынҭқарартә филармониа асолист, Ахьӡ-аԥша аорден ахԥатәи аҩаӡара занашьаз Иури Нарманиа иахьа аҵыхәтәантәи имҩахь днаскьаргоит Аҟәа.