АҞӘА, ԥхынҷкәын 17 – Sputnik, Бадри Есиава. Ааҩык рҟынтәи быжьҩык Очамчыратәи ақәԥаҩцәа қәыԥшцәа аԥыжәаратә ҭыԥқәа ааныркылеит СССР ачемпион Владимир Радионов игәалашәара иазкыз зхы иақәиҭу ақәԥаразы IV-тәи атурнир аҿы, Санкт-Петербург ҳәа Sputnik акорреспондент изеиҭеиҳәеит азыҟаҵаҩ Ҭемыр Џьапуа.
"Сареи Ҳаџьараҭ Гадлиеи ҳааӡамҭацәа атурнир аҿы актәи, аҩбатәи, ахԥатәи аҭыԥқәа ааныркылеит. Актәи аҭыԥ ныркылеит: Рустам Лагинӡиа, Асҭамыр Кәыҵниа, Богдан Багаҭелиа. Араӡны ргеит — Алан Аԥшьлааи Беслан Багаҭелиеи, ахԥатәи аҭыԥ ныркылеит Леон Кәыҵниеи Дауҭ Ҷолокәуеи", — иҳәоит азыҟаҵаҩ.
Иара иазгәеиҭеит очамчыратәи акоманда ари атурнир раԥхьаӡа акәны ишалахәхаз. Дара уахь инарыԥхьеит аиҿкааҩцәа. Санкт-Петербургҟа инеит Урыстәыла арегионқәа 250 Белоруссеиеи рҟынтәи аспортсменцәа.