АҞӘА, ԥхынҷкәын 21 – Sputnik, Бадраҟ Аҩӡба. Аҳәынҭқарратә усбарҭақәеи абиуџьеттә усҳәарҭақәеи (аҵареи агәабзиарахьчареи русҳәарҭақәа аалхны) афымцамч ахархәаразы еиҳа ршәалоит уажәшьҭарнахыс.
Аминистрцәа реилазаара аӡбарала атариф арҭ акатегориақәа рзы 60 копеи аҟынтәи 95 копеи ихалеит 1 кВт/с. азы.
Аԥарашәара абасеиԥш ишьақәыргылоуп:
– ахатәхаҿқәа рзы- 0,40 коп.
– аиуристтә хаҿқәеи хаҭалатәи анаплакыҩцәеи — 0,85 коп.
–аҳәынҭқарратә усбарҭақәеи абиуџьеттә усҳәарҭақәеи (аҵареи агәабзиарахьчареи русҳәарҭақәа аалхны) урҭ ираҟараны иԥхьаӡоу ахархәаҩцәеи – Аԥсны иҟоу Урыстәыла Ацҳаражәҳәарҭеи, Урыстәыла Ашәарҭадаратә маҵзуреи робиектқәагьы абрахь иналаҵаны — 0,95 коп.
–аҭыԥантәи абиуџьет аҟынтәи аԥаразоужьра зырҭо аҳәынҭқарратә органқәеи абиуџьеттә усҳәарҭақәеи (аҵареи агәабзиарахьчареи русҳәарҭақәа аалхны) — 0,60 коп.
– аҵареи агәабзиарахьчареи русхк аҟны икоммерциатәым аиҿкаарақәа — 0,30 коп.
– афымцамч ахархәарала иныҟәо аихамҩатә транспорт аобиектқәеи АУН "В.Г. Арӡынба ихьӡ зху Жәларбжьаратәи аҳаиртә баӷәазеи" робиектқәа — 0,20 коп.
– адәахьтәи алашареи ӡыла аиқәыршәареи еиҿызкаауа анхамҩа-коммуналтә наплакқәеи аиҿкаарақәеи — 0,15 коп.
– афымцамчала иныҟәо ақалақьтә транспорт аобиектқәа — 0,10 коп.
– АУН "Аихамҩа аусбарҭа" анапаҵаҟа иҟоу астанциаҟәшақәа — 0,02 коп.
– Аԥсны Аҳәынҭқарра иарезидентцәам ахархәаҩцәа — 1,20 коп.
Аԥсны аекономика аминистр иҳәеит афымцамч азы атарифқәа рыҳаракра ареспублика ауааԥсыреи аиуристтә хаҿқәеи анырра шырнамҭо.