АҞӘА, ажьырныҳәа 4 — Sputnik. Ахәаша ахәылбыҽха иқәлаз аԥша ӷәӷәа амшала икаҳаз аҵла афымцатә цәаҳәа иақәҳан, ааха роуит афымцамч аазгоз ԥшь-цәаҳәак ҳәа адырра ҟанаҵеит "Амшынеиқәафымцамч" Facebook адаҟьаҿы.
Авариа ахьыҟалаз аҭыԥахь иаразнакала еихеит "Амшынеиқәафымцамч" аусзуҩцәа, уи адиректор хада Аслан Басариа дналаҵаны.
"Ихәлаанӡа ҩ-цәаҳәак рыбжьазаара еиҭашьақәҳаргылеит, аха амшгьы бааԥсын аҟынтә уаҳа аусуха ҳнамҭеит. Арахь иара ахьыҟалаз аҭыԥгьы ус ааигәа-сигәа унеиуа иманшәалам, аӡбаарақәа ыҟоуп, аусура ашәарҭара ацуп. Убри аҟнытә иҳаӡбеит уаҵәы ашьыжь асааҭ 7 рзы ҳусурақәа ирыцаҳҵарц", — иҳәеит Басариа.
Фымца лашарада иаанханы иҟоуп Гәылрыԥшь араион ахь иаҵанакуа Баӷмаран ақыҭеи Каштаки.