Аԥсны зҽаԥсазтәыз аҳакьым, апедиатр Цицина Барганџьиаԥҳа 86 шықәса дшырҭагылаз лыԥсҭазаара далҵит ажьырныҳәа 16 рзы. Лара акыр шықәса лзанааҭ ала аус ахьылухьаз анаҩсгьы Аԥсны Иреиҳаӡоу ахеилак ахь ҩынтә депутатс далырххьан. Аԥышәа змаз аҳақьым лџьабаа алыркаахьан аиҳабыратә ҳамҭақәа рыла.
"Аҵара мацара акәым, аҟазшьа бзиа змаз, ауҩра злаз лакәын. Пату еиқәаҳҵон, лыҩны снеиуан. Лаб еицырдыруаз ԥсыуа хаҵан Ҭемыр Барганџьиа, Дырмит Гәлиа ианшьа иԥа иакәын. Ҽнак зны Қарҭҟа аҵарахьы ҳанцоз рыҩнаҭа снет, Дырмит Гәлиа дырҭан. Исхашҭӡом, амҩа ҳанықәлоз ацәца шьҭыхны ҳаиныҳәеит: "Шәыԥсадгьыли шәызхылҵызи рзы шәыхьӡырҳәаганы Анцәа шәҟаиҵааит!" ҳәа. Сара сахьынӡахьӡырҳәагахаз сыздыруам, аха Цицина Дырмит илзиҳәаз ажәақәа дрыԥсахеит, хымԥада.
Очамчыра ахәыҷтәы ҳақьымс аус луан, анаҩс Аӡҩыбжьа. Ақыҭа зегьы деицырдыруан, пату лықәын. Аԥсны Иреиҳаӡоу ахеилак адепутатс дыҟан.
Еицырдыруа аԥсуа актиор Шьаликәа Камкиеи лареи аҭаацәара бзиа аԥырҵеит. Баграт Шьынқәба ишиҳәахьаз еиԥш "жәлар рыбзиабара ҟьалан иааӡом", Цицина дызлаз аҳаблагьы ақыҭагьы бзиа деицырбон", - иҳәеит Ануа.
Инеиҵыху аицәажәара шәазыӡырҩыр шәылшоит арадио Sputnik Аԥсны аефир аҿы.