АҞӘА, ажьырныҳәа 23 - Sputnik. Шьамтәыла аҳәамҭа ҟанаҵеит Израиль имҩаԥнагаз ажәылара аҭакс Тель-Авивтәи аҳаиртә баӷәаза иаеихсыр шалшо. Абри атәы аанацҳаит РИА Новости, ООН иҟоу Шьамтәыла ахаҭарнак Башар аль-Џьаафари иажәақәа шьаҭас иҟаҵаны.
Шьамтәыла Адәныҟатәи аусқәа рминистрра аамҭа-аамҭала ашәҟәқәа рзынынашьҭуеит ООН амаӡаныҟәгаҩ хадеи Ашәарҭадаратә хеилаки, Израиль Арабтә республика Шьамтәыла аганахь ала иҟанаҵо ақәыларақәа ирықәыӡбарц.
"Ашәарҭадаратә хеилак ауснагӡатәқәа аднамкылар Шьамтәыла иамоу азин ахы ианархәароуп Израиль иҟанаҵо аганахь ала", - ҳәа иҳәеит аль-Џьаафари.
Израильтәи аруаа ашәахьа ауха Шьамтәыла аҵакыра иалахысит. Тель-Авив ирҳәоит асеиԥш зыҟарҵаз ирантәи арратә мчрақәа Голантәи аҳаракырақәа иахьрехсуаз азоуп ҳәа.