АҞӘА, жәабран 6 - Sputnik, Асмаҭ Ҵәыџьԥҳа. Германиа инхо, шьҭрала иаԥсыуоу аспортсмен Кораи Џьенгиз (Ацыгәба) GMC German MMA Championship дшачемпионхаз атәы Sputnik иазеиҭеиҳәеит ақәԥаҩ ихаҭа.
GMC German MMA Championship афинал аҿы "Machine" (англыз бызшәаҟынтәи "амашьына" – аред.) ҳәа хьӡыс измоу аспортсмен анемец қәԥаҩы Марк Дусесс диндаҭлон. Кораи аринг ахь аԥсуа бираҟ неигеит.
"Сара саԥсыуоуп. Уи сгәадуроуп. Сахьықәгыло зехьынџьара аԥсуа бираҟ сыцуп. Уи зегьы пату рзақәуп. Сцәамаҭәаҿгьы аԥсуа символика аҭыԥ амоуп. Ауаа аинтерес кны ианазҵаалак сыԥсадгьыл аӡбахә рзеиҭасҳәоит", - иҳәеит иара.
Аспортсмен иҭаацәа Аԥснытәқәоуп. Иаб Озҳан Џьенгиз (Ацыгәба) акраамҭа ара аус иуан. Кораи ихаҭа иҭоурыхтә ԥсадгьыл ахь дмаац, аха нанҳәамзазы аара игәы ишҭоу иҳәеит.
"Аԥсны асимволика саҵагыланы ақәгылара хьыӡны исыԥхьаӡоит. Сыжәлари сыԥсадгьыли бзиа избоит. Исҭахуп сиааирақәа иреигәырӷьаларц. Сыбызшәа сыздырам, аха аҵара сгәы иҭоуп", - иҳәеит аспортсмен.
2019 шықәса анҵәамҭазы Кораи Аладатәи Кореиа имҩаԥысраны иҟоу German MMA Championship ачемпионат алахәхара игәҭакуп.
"2019 шықәса рзы сыгәҭакқәа зегьы сзынагӡар, 2020 шықәса рзы схатәы школ аасыртуан", - иҳәоит иара.
Кораи Џьеенгиз (Ацыгәба) - 35 шықәса зхыҵуа аспортсмен, шьҭрала даԥсыуоуп. 2014 шықәса раахыс ақәԥареи кикбоксинги инапы рылакуп, 2017 шықәса раахыс MMA далахәуп, German MMA Championship; Hard Fighting Championship рҟны дықәгылоит.