АҞӘА, жәабран 28 – Sputnik, Асмаҭ Ҵәыџьԥҳа. Тхеквондо азы Аԥсны еизгоу акоманда алахәылацәа жәабран 22-24 рзы Шәача имҩаԥысуаз аиндаҭлараҿы ахьтәы медалқәа 15, араӡны медалқәа 8, аџьаз иалху амедалқәа 3 ранашьахеит ҳәа Sputnik иазаалыцҳаит акоманда азыҟаҵаҩ Саида Гәынԥҳа.
Тхеквондо азы Аԥсны еизгоу акоманда 7 - 16 шықәса зхыҵуа 29-ҩык аспортсменцәа рыла ишьақәгылоуп. Акомандатә зшьала актәи аҭыԥ ныркылеит.
"Аиҵбацәа рҟынтәи ирацәаҩуп раԥхьаӡа акәны ареспублика анҭыҵ ақәгылараз инеиз, аха урҭ рхы бзиаӡаны иаадырԥшит, ақәҿиарақәагьы роуит. Актәи аԥшь-ҭыԥк ааныркылеит", - ҳәа лҳәоит азыҟаҵаҩ.
Гәынԥҳа лажәақәа рыла, акоманда иагәҭакуп тхеквондо азы Адыгеиа имҩаԥысраны иҟоу Урыстәыла ачемпионат аҽалархәра.