АҞӘА, мшаԥы 2 – Sputnik, Асмаҭ Ҵәыџьԥҳа. Очамчыратәи ахәышәтәырҭа аҳақьым хада лхаҭыԥуаҩ Надежда Воуԥҳа лыҩны арҭҟәацга ԥжәеит Кәтол ақыҭан, ашьыжь, асааҭ 8:30 рзы ҳәа аанацҳауеит Аԥсны Аҩныҵҟатәи аусқәа рминистрра асаит.
Аԥсны Аҩныҵҟатәи аусқәа рминистрра адыррақәа рыла арҭҟәацга ԥжәеит Кәтол ақыҭан, ашьыжь, асааҭ 8:30 рзы, Воуаа рыҩны. Ахәра зауз Агәыӡератәи арратә госпиталь ахь днагоуп.
"Ахәра зауз аоперациа лызууп, лызшьапык ҿыхуп. Уажәы лыԥсҭазааразы шәарҭара ыҟам", - ҳәа рҳәоит агоспиталь адкыларҭатә хәҭаҿы.
Аҭыԥ аҿы аус руеит аексперт- криминалистцәа ргәыԥ.
Азинхьчаратә усбырҭақәа ахҭыс иадҳәалоу ауаа рышьақәыргылара иаҿуп.