АҞӘА, мшаԥы 7 - Sputnik. Венесуела ахада Николас Мадуро иҳәеит Венесуела ашҭақәа рҟны 5 миллионҩык ауааԥсыра шцәырҵыз напхгара зуа азакәантә еиҳабыра адгылара аадырԥшырц, абри атәы аанацҳауеит РИА Новости.
"Хәмиллионҩык рҟынӡа амобилизациа рызуп ахақәиҭреи аҭынчреи рыхьчара иазку аоперациазы. Ажәлар адәқәа рахь ицәырҵит рыдгьыл аолигархцәа ракәымкәа, ажәлар ишыртәу дырбаразы. Ахақәиҭреи аҭынчреи рыхьчаразы аоперациа маншәаланы имҩаԥысит", - иҳәеит Венесуела ахада, Каракас зықьҩыла идгылаҩцәа имҩаԥыргаз ақәгылараҟны.
Николас Мадуро иара убас адырра ҟаиҵеит ртәыла афымцалашара ааха аиура аҭҵаара иахьаҿу ишеилыркааз Хиустони Чикагои, иара убас Чилии Колумбиеи рҟынтәи ЕАА рыцхыраарала акомпиутертә вирусқәа Венесуела афымцатә система ишаларгалоз. Иара убасгьы мызкы иҭагӡаны ари аҭагылазаашьа шҭышәныртәалахо атәы иҳәеит.
Николас Мадуро егьырҭ аҳәынҭқаррақәеи аиҳабырақәеи рхадацәа рахь ааԥхьара ҟаиҵеит Вашингтон Каракас иаҿагыланы имҩаԥнаго ақәымчра ааннакыларц азы иқәгыларц.
Уи, иеизаз ижәлар дрылаԥшуа, Дональд Трамп иизынархаз ажәа иҳәеит: "Сыжәлар шәрылаԥш - иаҭаххар, урҭ зқьынтәгьы ишәиааиуеит!" - ҳәа.
Мадуро иара убасгьы Венесуела иҟоу амчрақәа зегьы амилаҭтә еидгылара аадырԥшырц, рҳәынҭқарра акзаара иазхьаԥшырц ажәа рниҵеит, рҳәоу еиқәшәаны, ЕАА Венесуела аекономика иазыруа аахақәа ааныркыларц азы аҳәамҭа еицыҟарҵарц азы дрыҳәеит.
"Иахьа ҳазҭадыргылаз аблокада аԥырхроуп! Иарбан санкциоу ҳазқәдыршәозаалак, иақәнагоу аҭак аҳҭалоит, иҵегьы иеиҳау ареволиуциақәа мҩаԥаҳгалоит. Урҭ ҳара ахаангьы иаҳиааираны иҟаӡам!" - иҳәеит Николас Мадуро.
Ажьырныҳәа 21 рзы Венесуела иахьатәи ахада Николас Мадуро иҿагыланы Каракас ақәгыларақәа ирылагеит. Апарламент ахада Хуан Гуаидо ажьырныҳәа 23 рзы атәыла ахадас ихы рылеиҳәеит.
Усҟан Гуаидо истатус адгылара арҭеит Еиду америкатәи аштатқәеи егьырҭ атәылақәа жәпаки.
Урыстәыла Мадуро адгылара инаҭоит аконституциатә шьаҭа зманы иҟоу атәыла ахадак иаҳасаб ала.
Европатәи атәылақәа зеижә: Испаниа, Португалиа, Германиа, Великобританиа, Даниа, Нидерланды, Франциа, Венгриа, Австриа, Финлиандиа, Бельгиа, Лиуксембург, Чехиа, Латвиа, Литва, Естониа, Польша, Швециа, Хорватиа, Македониа, Румыниа - жәабран 4 рзы рнапы еицаҵарҩит адекларациа, уа иазгәарҭеит Хуан Гуаидо аамҭалатәи Венесуела ахада ҳәа дшазхарҵо.