АҞӘА, мшаԥы 9 - Sputnik. Аԥсуа драматә театр ҳамҭас иарҭеит миллионки ҩышә нызқь мааҭ иаԥсоу ароиаль ҳәа радио Sputnik Аԥсны иазеиҭеиҳәеит атеатр адиректор хада Нодар Ҷанба.
Ҷанба иазгәеиҭеит Германиатәи амеценатцәа, иҩызцәа Аԥсуа драматә театр ҳамҭас иарҭеит Steinway & Sons иаҭыжьымҭоу ароиаль ҳәа.
"Аинструмент акраамҭа Москва рхы иадырхәон, нас Казанҟа ииаган. Казантәи аконсерваториаҿ ирҭахын араоиаль хышықәса ҳәа ҿҳәараны иаҭаны иаархәарц, аха изтәыз ари ажәалагала дақәшаҳаҭымхеит. Аԥхьаҵәҟьа иаразы 2 миллион мааҭ иаҳәон, нас – миллионки бжаки, аҵыхәтәаны 1 200 000 мааҭ ҳәа иаархәеит", - ҳәа иҳәоит Ҷанба.
Иара иазгәеиҭеит уаанӡа Аԥсны ахада Рауль Ҳаџьымба ари аинструмент аахәаразы аԥаразоужьра шымҩаԥигахьаз, уажәы урҭ аԥарақәа атеатр аҭахрақәа ишырзырхахо.
"Аханатә атеатр аҿы иҟан ароиальқәа, аха аремонт амҩаԥгараан адәахьы идәылыргеит. Ҳәарада иԥхасҭахеит. Адунеи адраматә театрқәа зегьы рҿы иҟоуп араоиальқәа. Ҳара уажәшьҭа аконцертқәа рымҩаԥгарагьы ҳалшоит", - ҳәа еиҭеиҳәоит Ҷанба.
Нодар Ҷанба агәыӷра имоуп ԥхьаҟагьы амеценатцәа Аԥсуа драматә театр иацхраалап ҳәа.