"Чернобыль ааха ӷәӷәа аныҟалаз шықәсык аҟара акәын иҵуаз ахәышәтәырҭаҿы аус зуеижьҭеи. Авоенкомат аҟнытә иааит адырра, ацхыраара шырҭаху атәы. Еиуеиԥшым ахәышәтәырҭақәа рҟнытә ҳаизырган, Қарҭ ҳрышьҭит, мызкы уа ҳаҟан, анаҩс аешелон еизганы ҳдәықәырҵеит. Аҭҟәаҵра ахьыҟалаз аҭыԥ аҟынтә ҩажәижәабатәи километр аҿы агоспиталь ду ааҳарҭит. Кавказтәи аокруг аҟнытә ҳара ҳауп цхыраарас раԥхьа уахь инеиз. Ацхыраара заҳҭоз шьҭа аԥсра ихықәгылаз ракәын, аиҳараҩык урҭ аҭыԥантәи ауааԥсыреи ҳаԥхьа ацхыраара ҳәа инеизи ракәын. Хымԥада, сазхәыцуан, иарбан шәарҭароу схы зҭасыргылоз, аха уи сара исуалԥшьан", - азгәалҭоит Ҟалӷьԥҳа.
Амедиаҳәшьа илгәалалыршәоит дара ахәшәқәеи амыругақәеи рыла ишеибыҭан, аха зшьапы иқәдыргылаз ҳәа аӡәгьы дшыҟамыз.
"Ҳара иҳарҭон аспирт, ҳачмазҩымхарц. Усҟан арыжәтә агьама сыздыруамызт, ҳқәыԥшамзи аҟнытә, ҳаԥхашьаны маӡала иаҳжәуан, есыҽны ҵәыцак азна. Ҳакәша зегьы цәҳәыран, еизҳауаз аҵыҵындра даара идуун, ҳаҽҳазнымкылакәа ианаҳфозгьы ыҟан", - еиҭалҳәоит Ҟалӷьԥҳа.
Инеиҵыху аиҿцәажәара шәаҳар шәылшоит арадио Sputnik Аԥсны аефир аҟны.