"Баграт Уасил-иԥа иҩымҭа дуӡӡа ишьҭнахуа атема хьанҭоуп, иҭбаауп, аԥсуа литература аҟны иаанхоит. Аҩымҭа аԥсуаа ҳҭоуых, усҟантәи аамҭақәа рзы ҳгәаҟрақәа ртәы аҳәоит. Акыр аамҭа шцахьоугьы уи иҳанаҳәо рацәоуп. Иахьатәи аспектакль ҳҭоурых ахь ҳхьанарԥшуеит, иҳанаҳәоит ахәыцра, аизыӡырҩра, аидгылара шаҭаху. Аспектакль акәзар иқәзыргылаз уамашәа дызбоит, избанзар дрежиссиорӡам, аха аҟазара аарԥшны, ибзианы иҟаиҵеит. Ароль хадақәа назыгӡоз сгәаҟынӡа инеит, ажәларгьы ибзианы ирыдыркылеит. Сгәанала аспектакль рықәҿиеит, аԥсуа культуразы ихҭыс бзиоуп", - ҳәа азгәеиҭеит Цыгәба.
Баграт Шьынқәба ироман "Ацынҵәарах" ала лаҵара 22-23 рзы Аԥснытәи аҳәынҭқарратә театр аҟны Аҿар ртеатр ақәыргыламҭа аԥхьарбара мҩаԥнагоит. Аспектакль арежиссиор-ақәыргылаҩс дыҟоуп Аҿар ртеатр актиор Алиас Аҩӡба.