Аԥсны "Детская Новая волна-2019" аҟны

Жәларбжьаратәи аиндаҭлара "Детская Новая волна-2019" афинал аатит Ҟрым. Лаҵара 30-31 рзы Иалта имҩаԥгахоит аҩбатәи ахыркәшаратә мшы.
Sputnik

АҞӘА, лаҵара 31 – Sputnik, Бадраҟ Аҩӡба. 12 шықәса зхыҵуа Аԥснытәи ашәаҳәаҩ қәыԥш Сара Абрамиан дықәгылоит "Детская Новая волна-2019" афинал аҿы лаҵара 31 рзы.

Аԥснытәи аҭыԥҳа Сара Абрамиан аицлабра "Детская Новая волна-2019" афинал ахь днеит

"Сара раԥхьаӡа акәны "Детская Новая волна-2019" салахәхарц сааит. Ара даара исгәаԥхеит. Ара сзабадырыз рацәаҩуп. Аҩызцәа рацәаҩны исырҳаит", - лҳәеит Сара Абрамиан.

Аҩбатәи аиндаҭларатә мшы азы Сара иналыгӡоит ашәа "Птица".

"Сара исҭахуп адгылара сызҭо стәылауаа зегьы ҭабуп ҳәа расҳәарц. Даара агәахәара снаҭоит иаадырԥшуа абзиабара", - лҳәоит ашәаҳәаҩ.

Аиндаҭлара асас иҳасаб ала ааԥхьара лыҭан Валериа Адлеиаԥҳа.

"Сареи Лизой Трофимовеи Олег Газманов ҳицықәгылоит. Иара убасгьы ҳара ҳалахәуп Игор Крутои иакадемиатә хор инанагӡо аномерқәа. Ара иҟоуп Алсу, Зара уҳәа еицырдыруа ашәаҳәаҩцәа", - еиҭалҳәоит Валериа.

Валериа Адлеиаԥҳа илҳәоит даара дшеигәырӷьо "Детская Новая волна-2019" ахәаԥшыҩцәа рҿаԥхьа дахьықәгыло.

Аԥсны "Детская Новая волна-2019" аҟны

"Аҭагылазаашьа ҟәанда аԥҵоуп. Еснагь иуоуеит агәазыҳәара ахынҳәраз. Апроект "Ты, супер!" ашьҭахь, 2017 шықәса рзы ара сықәгылон", - илгәалалыршәоит Адлеиаԥҳа урҭ аамҭақәа.

Аиндаҭлара дсасны даҭоуп ашәаҳәаҩ– Милена Барцыцԥҳа. Лара 2016 шықәса рзы раԥхьаӡа акәны Аԥсны ахаҭарнак лаҳасаб ала дықәгылон.

Аԥсны "Детская Новая волна-2019" аҟны

"Уи аахыс еиуеиԥшым аиндаҭларақәа рахь снарыԥхьоит. Сынтәа италиатәи ашәа насыгӡоит. Ара сара аԥышәа ду соуит. Москва сиит, сааӡеит, аха лассы-лассы Аԥсныҟа снеиуеит. Ааигәа уа аклип ҭысхит", - лҳәоит лара.

"Артек" уажәы рыԥсы ршьоит ахәыҷтәы кәашаратә ансамбль "Адац" акәашацәа.

Аԥсны "Детская Новая волна-2019" аҟны

"Зегьы оумашәа иаҳгәаԥхоит. Ҳара ҳақәгылом аха афинал ҳазыԥшуп", - иҳәоит "Адац" алахәыла Влад Герзмаа.

"Детская Новая волна" жәаҩантәуп имҩаԥысуеижьҭеи. Афинал мҩаԥгахоит "Артек", "Артек-Арена" аҿы.

"Детская новая волна" афинал аҿы аԥснытәи ашәаҳәаҩ қәыԥш дықәгылоит

11-ҩык ашәаҳәаҩцәа аиааираз еиндаҭлоит. Ара иҟоуп: Урыстәыла, Аԥсны, Ермантәыла Беларусиа, Великобританиа, Ҟазахстан, Литва, Мальта, Узбекистан.