Рашәарамзазы аԥыза-министр Валери Бганба аҵареи аҭҵаарадырреи рминистрра анапынҵа аиҭеит аԥхынтәи ахәыҷтәы лагер "Ажәеиԥшьаа" аиҿкааразы.
"Ашколхәыҷқәа рлагер "Ажәеиԥшьаа" шьҭа ҩышықәсоуп еиҿаҳкаауеижьҭеи. Сынтәа аусура иалагоит ԥхынгәы 22 инаркны нанҳәа 18-нӡа. Ари аамҭа иалагӡаны ԥшь-гәыԥк аднакылоит алагер, ҵыԥх акәзар х-гәыԥк ыҟан. Ахәыҷқәа, мчыбжьык, Ауадҳара рыԥсы ршьалоит амшьамбақәа рҟны. Ирҭаауеит еиуеиԥшым аӡиақәа, аҭыԥ ԥшӡарақәа. Иара убас, сынтәа раԥхьаӡа акәны Аԥсуа ҳәынҭқарратә университет ацхыраарала еиҿкаахоит аҭоурых, аетнологиа, аԥсуа милаҭ рхымҩаԥгашьа атәы зҳәо алекциақәа. Убасгьы аԥсуа милаҭтә хәмаррақәа рхы рыладырхәоит ахәыҷқәа, идырбахоит аԥсуа фильмқәа. Ҵыԥх еиԥш сынтәагьы алагер аԥсуа цәа ахҵаны имҩаԥысуеит", - иҳәеит Қәҭелиа.
Инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.