АҞӘА, нанҳәа 23 – Sputnik. Гәдоуҭа араион апрокуратура ашьаус хацнаркит 1955 шықәса рзы ииз Мгәыӡырхәа инхо Анзор Дараҭиа-иԥа Леиба ишьра инамаданы, абри атәы аанацҳауеит Аԥсны Апрокуратура хада асаит аҟны.
Иара убас ашьаус хацыркуп амцабџьар изакәанымкәа аныҟәгареи, аҵәахреи, амҩангареи рзы.
"Ауаҩшьра мзызс иаиуз аҭҵаара иаҿуп аоператив-усҭҵааратә гәыԥ. Ахҭыс ахьыҟалаз аҭыԥ аҟны иԥшаан иагьылхын 7.62 зышәагаа ыҟоу автоматтә бџьар иатәу аџьазцәақәа 3", - ҳәа аанацҳауеит адырраҭара.
Аԥсны Аҩнуҵҟатәи аусқәа рминистрра ауаҩшьра ҟазҵаз ахаҿы иаанкыларазы аусмҩаԥгатәқәа ирҿуп.
"Инаҳагӡахьоу аҭҵаарақәа ирыбзоураны иеилкаауп ари ацәгьоура зуз ҳәа гәҩарас ирымоу ихьӡ - уи 1983 шықәсазы ииз Леиба Анри Анатоли-иԥа иоуп", - аҳәоит адырраҭараҿы.
Заанаҵтәи адыррақәа рыла, ауаҩшьра ҟалеит нанҳәа 23, асааҭ 12:30 рзы иршьыз Анзор Леиба дахьынхоз аҩны азааигәара.
Ашьаусҭҵаара инапы иануп Гәдоуҭа араион апрокуратура аусҭҵааҩ.
Иара убас шәаԥхьар ҟалоит:
- Ԥсҳәы ақыҭан аԥҳәыс лышьра аҽазышәаразы ашьаус хацыркуп
Кьалашәыр ақыҭан ауаҩшьра ҟалеит