Агәыҳалалратә акциа "Гәыразыла" аҳәаақәа ирҭагӡаны Москва имҩаԥысуеит "Каданс" аконцерт, иара убас иара иалахәуп Москва инхо ашәаҳәаҩцәа қәыԥшцәеи аҟазаратә гәыԥқәеи. Абилеҭқәа рыҭираҟынтәи идырҳауа зегьы афонд "Ашана" иахыԥхьаӡалоуп.
"Акциа амҩаԥгаҩцәа қәыԥшцәоуп аҟнытә иҳаӡбеит уи иаднагалап Москва аҵара зҵо астуденцәа, аҿар, иара убри алагьы ишәаҳәартә, икәашартә программа еиҿкаан. Ахәыҷы ацхыраара лыҭаразы иҳаргылеит аԥараҭаԥсарҭа, доусы илшоз ала ацхыраара ҟаиҵарцаз. Ԥарала ахәыҷы илызхаша ҳзеизымгаӡеит, астудентцәа иаап ҳәа ҳзықәгәыӷуаз зымааит. Абри акциала ҳара раԥхьа иргыланы аҿар еибабартә иҟаҳҵеит, анаҩс напеилаԥсала ахәыҷы ацхыраара лыҭаразы", - ҳәа лҳәеит Ҳагԥҳа.
Инеиҵыху аиҿцәажәара иара убас шәазыӡырҩыр шәылшоит арадио Sputnik Аԥсны аефир аҿы.