АҞӘА, жәабран 10 - Sputnik. Урыстәыла Ацҳаражәҳәарҭаҿы иазгәарҭеит адипломатиатә усзуҩ Имш.
Аԥсны иҟоу Урыстәыла Ацҳаражәҳәаҩ Алексеи Двинианин Аԥсны адәныҟатәи аусқәа рминистр Даур Ақаҩба ҭабуп ҳәа иеиҳәеит адипломат Имш иазку ауснагӡатә ихы ахьалаирхәыз.
"Ҳара ара ҳаизеит ҳҩыза, ҳколлега, змаҵуратә напынҵақәа назыгӡоз Дмитри Вишерневи иԥшәмаԥҳәыс Ольгеи ҳгәалаҳаршәарц. Вишерневаа рҭаацәа рышьра иаанарԥшуеит ҳзанааҭ абџьарԥынҵа иаҵаркыргьы шыҟалоу", - иҳәеит иара.
Зыԥсҭазаара змаҵзуратә напынҵақәа ирықәызҵаз адипломатцәа зегьы, урыстәылатәи адипломатиа апантеон иаҵанакуеит иҳәеит Двинианин.
Аԥсны адәныҟатәи аусқәа рминистр Даур Ақаҩба Аԥсны иҟоу Урыстәыла Ацҳаражәҳәаҩ Алексеи Двинианини Ацҳаражәҳәарҭа аусзуҩцәеи аныҳәамш рыдиныҳәалеит.
"Исҳәар сҭахуп шәара ара инашәыгӡо аусура аҿиареи аизҳазыӷьареи ишырзырхо", - иҳәеит Даур Ақаҩба.
Ауснагӡатә алахәылацәа амемориалтә ӷәы аҿаԥхьа ашәҭшьыҵәрақәа шьҭарҵеит.
Аԥсны иҟоу Урыстәыла Ацҳаражәҳәарҭа актәи амаӡаныҟәгаҩ Дмитри Вишернев иехсны дыршьит цәыббра 9 2013 шықәса рзы Аҟәа. Адипломат иԥҳәыс Ольга Вишернева илоуз ахәрақәа ирхырҟьаны ахәышәтәырҭаҟны лыԥсҭазаара далҵит цәыббра 14 рзы.
Урыстәыла адипломатиатә усзуҩ Имш азгәарҭоит жәабран 10 рзы. Иара шьаҭаркын жьҭаара 31, 2002 шықәса рзы.
Арыцхә ҵаҵӷәны иамоуп Урыстәыла адәныҟаполитикатә усҳәарҭа актәи адҵа анҭыҵыз амш – жәабран 10 1549 шықәса.