Очамчыра имҩаԥысуеит карате кекусинкаи азы атурнир

Владислав Арӡынба игәалашәара иазку карате кекусинкаи азы атурнир иалахәхоит 120 спортсмен, Аԥсни Урыстәылеи рҟынтәи.
Sputnik

АҞӘА, жәабран 13 – Sputnik, Асмаҭ Ҵәыџьԥҳа. Жәабран 15 Очамчыра имҩаԥысуеит Владислав Арӡынба игәалашәара иазку карате кекусинкаи азы ахәбатәи жәларбжьаратәи атурнир. Абри атәы Sputnik иазеиҭеиҳәеит Очамчыра араион аспорттә школ аҟны карате кекусинкаи азыҟаҵаҩ, атурнир аиҿкааҩ Зураб Мурадиан.

Владислав Арӡынба игәалашәара иазку карате кекусинкаи азы атурнир иалахәхоит фышықәса иреиҳау 120 спортсмен, Аԥсни Урыстәылеи рҟынтәи.

"Атурнир еиҳа-еиҳа аҽарҭбаауеит, ауаа еиднакылоит. Иара рҽаладырхәырц арахь иаауеит Урыстәыла ақалақьқәа рҟынтәи. Ҳкаратистцәа даара игәышьҭыхганы рхы аадырԥшуеит", - азгәеиҭоит Мурадиан.

Аиубилеитә турнир мҩаԥысуеит Очамчыра араион ахадара аҿари аспорти рыҟәшеи карате кекусинкаи азы Аԥсны Афедерациеи рыдгыларала.