АҞӘА, жәабран 20 – Sputnik. Аԥсны ахада инапынҵақәа назыгӡо аԥыза-министр Валери Бганба аусутә ныҟәарақәа мҩаԥигеит Гагратәии Гәдоуҭатәии араионқәа рахь. Абри аамҭазы иара игәеиҭеит Ԥсоу-Аҟәа амҩа ахәҭақәак.
Аҟәатәи амҩаду Баӷрыԥсҭа иахьаҵанакуа ахәҭак аҿы ҵыԥх иҟалаз адгьылҳәазара аԥхасҭа анаҭеит. Аусурақәа уа ирылаган 2019 шықәса жьҭаарамзазы. АУН "Аԥсныавтомҩа" адиректор Борис Ачба Аԥсны ахада инапынҵақәа назыгӡо аԥыза-министр Валери Бганба изеиҭеиҳәеит аобиект аҿы аусурақәа шцо атәы.
Иара иажәақәа рыла аусурақәа реиҳарак мҩаԥгоуп. Иеиҭашьақәыргылоу амҩахәҭа ахәԥса 22 миллион мааҭ итәоит. Атәыла ахада ирезервтә фонд аҟынтәи 20 миллион ршәахьеит.
Валери Бганба иара убасгьы Чаӷрыԥшь ақыҭа иахьаҵанакуа амҩахәҭахьгьы днеит. Уа хара имгакәа аусурақәа ирылагараны иҟоуп.
Ари аҭыԥ аҿы аҭӡырӷәӷәагақәа роура 10 метрак инаӡоит. Аиҭашьақәыргыларақәа рыхәԥса 11 миллион мааҭ ҟалоит.
Ацхыраара аҭахуп аӡыҷҷа Чагрыԥшь иху ацҳа. АЕ "Аԥсныҟәарахьчара" анапхгаҩы Игор Казанба ишиҳәаз ала аҭҵаарақәа раан иаарԥшын ацҳа аконструкциа аԥхасҭа шамаз.
Аиҭашьақәыргыларатә усурақәа рыхәԥса аекспертиза ишьақәнаргылараны иҟоуп иҳәеит иара, убри аан бжьаратәла 11 миллион рҟынӡа артәар ҟалоит ҳәа агәаанагара имоуп. Абраҟагьы аԥаразоужьра зуа ахада ирезервтә фонд акәхоит.
Гәдоуҭа араион аҿы Бганба Лыхны ақыҭахь узланеиуа амҩаҿы аҭыԥ змоу адгьылҳәазара дахәаԥшит. Харџьынҵала ара 9 миллион мааҭ аҭаххоит. Ацхыраара зҭаху амҩахәҭа 160 метра инаӡоит.
Иара убас шәаԥхьар ҟалоит:
Мархьаул ақыҭан Маҷара аӡиас ацҳа хҵаны иалгеит
Аиҭашьақәыргылара ацашьа: "Аԥсныавтомҩа" имҩаԥгоу аусурақәа ирылацәажәоит