АҞӘА, хәажәкыра 30 - Sputnik. Аԥсны ахада инапынҵақәа назыгӡо Валери Бганба Аҩнуҵҟатәи аусқәа рминистрра дҵас ириҭеит Гали Очамчыреи араионқәа рыбжьара амҩа адыркырц, абри атәы аанацҳауеит Аминистрцәа реилазаара асаит.
"Аҳәынҭавстоинспекциа астационартә пункт "Канал" аҟны иаарласӡаны амилициа акардон шьақәыргылазааит, Гали Очамчыреи араионқәа рҿы инхо ҳтәылауаа аимадара рыбжьамларц азы. ААР аструктуратә ҟәшақәа рымч ала асааҭ 21:00 инаркны иаагоу амҩахәҭаҿы ироуз адҵа анагӡара иаҿуп", - ҳәа аарыцҳауеит адырраҭараҿы.
Аҩнуҵҟатәи аусқәа рминистрра Гали Очамчыреи рыбжьара амҩа адыркит
© Foto / Пресс-служба Кабинета Министров РА
Уаанӡа Аԥсуа телехәаԥшраҿы ишиашоу ицо аефир аҿы Ауааԥсыра акоронавирустә инфекциа рацәыхьчаразы акоординациатә хеилак алахәыла, Апарламент адепутат Алхас Џьынџьал иҳәеит Жәыргьыҭ аклиникақәа руак иҭашәаз Гал араион иқәынхо аԥҳәыс акоронавирустә чымазара ҿкы лылоуп ҳәа заанаҵтәи адыррақәа рыла ишышьақәырӷәӷәоу.
Акоронавирус аламырҵәаразы имҩаԥырго аусурақәа ртәы шәаԥхьар ҟалоит абра>>