АҞӘА, мшаԥымза 5 – Sputnik. Аибашьыгатә граната РГД-5 ԥшаан Гәдоуҭа, Маан имҩала ҳәа Sputnik акорреспондент изааицҳаит Аҭагылазаашьа ҷыдақәа рминистрра апиротехника аҟәша аиҳабы Рамиз Цыгәба.
"Аграната амацәази ачекеи амхын, уи ԥжәар акәын, аха изыхҟьазаалакгьы – иԥымжәеит. Ҳара ауаа ахьыҟамыз иаҳгеит, уаҟа иахьшәарҭам аҭыԥ иқәҵахоит", – иҳәеит иара.
АҶА аусзуҩцәа аграната ахьыԥшааз аҭыԥан амҩа ркит, иахәҭоу аусмҩаԥгатәқәа рынагӡаразы. Аџьаԥҳаны ауаа рынхарақәа рааигәара неишьас иаиуз аҭҵаара иаҿуп.