АҞӘА, мшаԥы 14 - Sputnik. Акоронавирустә инфекциа аҿагыларазы Аԥсныҟа иааганы Агәабзиарахьчара аминистрра иаҭоуп агуманитартә цхыраара. Абри атәы аалыцҳауеит Москватәи аԥсуа диаспора анапхгара алахәыла Инна Барчанԥҳа.
"Амедицинатә хархәагақәа хкырацәала иаахәоуп, иаахәоуп аныхратә материалқәа, амедицинатә персонал рзы ахыхьчагақәа. Иара убасгьы Аԥсныҟа иаашьҭуп арыԥҳақәа аҳауа рҭазырсуа аппаратқәа 21", - еиҭалҳәоит лара.
Лара илҳәеит Урыстәыла инхо ҳџьынџьуаа ари акциа рыбжьы шақәдыргаз, ԥхьаҟагьы аԥареизгара шымҩаԥгахо.
Барчанԥҳа илҳәеит хара имгакәа ареспубликазы агуманитартә цхыраара апартиа ҿыц шаашьҭхо.
Аԥсны Агәабзиарахьчара аминистрра амедицинатә хархәагақәеи ахәшәқәеи рыла аиқәыршәаразы аусбарҭа аиҳабы Ахра Аџьба еиҭеиҳәеит аминистрраҿы ишаарту ҷыдалатәи аԥхьаӡамҭа.
"Ҳара хымԥада иҳамазар акәу аныхратә материалқәа Урыстәылагьы уажәы рԥыхьашәара уадаҩуп. Уаҟагьы аепидемиологиатә ҭагылазаашьа уадаҩ ыҟоуп. Агуманитартә цхыраагӡа аҟынтәи ахәшәқәеи аныхратә материалқәеи еихаҳшоит амедицинатә усҳәарҭақәа рахь", - иҳәеит иара.
Иаагоу ацхыраара аиҳарак Гәдоуҭатәи ахәышәтәырҭахь инашьҭхоит.
Акоронавирус иазку ажәабжьқәа рзы аҵыхәтәантәи адыррақәа шәрыԥхьар ҟалоит абра>>