АҞӘА, мшаԥы 17 - Sputnik. Аԥсны иахьаҵанакуа афатә аалыҵ ахьырҭиуа аџьармыкьақәа мшаԥы 20 рынахыс иаадыртуеит. Абри азы аусдҵа инапы аҵаиҩит Аԥсны ахада инапынҵақәа назыгӡо Валери Бганба. Абри атәы ануп ахада исаит аҟны.
Аџьармыкьақәа русура аграфик ақалақьқәа, ма араионқәа рсанитар-епидемиологиатә маҵзурақәа рақәшаҳаҭрала иҳәаақәырҵоит. Аџьармыкьақәа макьаназы мчыбжьык ахь хымш аус рулоит.
Аусдҵа инақәыршәаны Аԥсны асанитартә ҳақьым хадеи ақалақьқәеи араионқәеи рсанитар-епидемиологиатә маҵзурақәеи рнапы ианҵоуп аџьармыкьақәа русура иалагаанӡа арзҩыдаратә усурақәа мҩаԥгазарц.
Аусурамш анҵәамҭазгьы ауаа рацәа зҭаауа аџьармыкьатә ҭыԥқәа арзҩыдара иахрыжьлоит.
Иара убас шәаԥхьар ҟалоит:
- Гәдоуҭатәи аџьармыкьа аартра аҿҳәаранӡа аусура иалагар алшоит
Амшаԥныҳәа аламҭалазы галаа аџьармыкьаҿы ахәаахәҭра азин рырҭеит