АҞӘА, мшаԥы 17 - Sputnik. Аԥсны иахьаҵанакуа раԥхьаӡа акәны мшаԥы 7 рзы акоронавирус зыдбалаз ахаҵа аҵыхәтәантәи атестқәа рҟны авирус шимам аадырԥшуеит. Аиҭагәаҭара ашьҭахь иара ахәышәтәырҭа илҩаара даздырхиоит ҳәа иҳәеит Агәабзиарахьчареи асоциалтә еиқәыршәареи рминистр Ҭамаз Ҵахнакьиа Аԥсны ахада инапынҵақәа назыгӡо Валери Бганба мшаԥы 17 рзы имҩаԥигаз Ашәарҭадаратә хеилак аилатәараҿ.
Аԥсны иахьаҵанакуа раԥхьаӡа акәны мшаԥы 7 рзы акоронавирус идбалан Гагра инхо атәылауаҩ. Уи хәажәкыра 29 рзы Москвантәи дхынҳәит. Аамҭақәак рышьҭахь авирус здырбалаз егьырҭ ҩыџьа ари ауаҩы иныруаз ауаа роуп. Урҭ руаӡәк Гәдоуҭатәи ахәышәтәырҭа дҭоуп, егьи аҩны дыҟоуп.
"Апациентцәа рыхәышәтәра мҩаԥысуеит абри аганахь ала ишьақәыргылоу аԥҟарақәа инарықәыршәаны. Аҭагылазаашьа шәарҭам", - иҳәеит Ҵахнакьиа.
Агәабзиарахьчареи асоциалтә еиқәыршәареи рминистр Ҭамаз Ҵахнакиа аиалтәараҿы иара убасгьы иазгәеиҭеит ауснагӡатәқәа зегьы ишахәҭоу ала ишымҩаԥгоу.
Акоронавирус иазку ажәабжьқәа рзы аҵыхәтәантәи адыррақәа шәрыԥхьар ҟалоит абра>