АҞӘА, мшаԥы 29 - Sputnik. Аԥсны ахада Аслан Бжьаниа аиҳабыра реилазаара ҿыц иалеигалеит хҩык аминистрцәа. Абри атәы аҳәоит Аԥсны ахада иофициалтә саит.
Асоциалтә еиқәыршәареи адемографиатә политикеи рминистрс дҟаҵоуп Руслан Аџьба. Аԥсны АҶА анапхгараҿ дааныжьуп Лев Кәыҵниа. Ҭамаз Ҵахнакьиа – Аԥсны агәабзиарахьчара аминистрс даанхоит.
Уаанӡа Аслан Бжьаниа Аминистрцәа реилазаара аструктура шьақәирӷәӷәахьан. Уи инақәыршәаны 12 министрра рхатыԥан 14 министрра ҟалеит.
Ахада иусдҵа инақәыршәаны Акурортқәеи атуризми рзы Аҧсны аҳәынҭқарратә еилакы Аҧсны Аҳәынҭқарра Атуризм аминистрра ҳәа еиҭакуп, Ақыҭанхамҩазы Аҧсны аҳәынҭқарратә еилакы – Аҧсны Аҳәынҭқарра Ақыҭанхамҩа аминистрра ҳәа.
Аҧсны Аҳәынҭқарра Агәабзиарахьчареи асоциалтә еиқәыршәареи рминистрра Аҧсны Аҳәынҭқарра Агәабзиарахьчара аминистрреи Аҧсны Аҳәынҭқарра асоциалтә еиқәыршәареи адемографиатә политикеи рминистрреи ҳәа еиҟәгарала ишьақәырӷәӷәоуп.
Аиҭакра иаҵанакит Аҧсны Аҳәынҭқарра арепатриациеи адемографиа рминистрра – Аҧсадгьыл ахь ахынҳәразы Аҧсны аҳәынҭқарратә еилакы ҳәа адемографиа аусхк аҟны иара афункциақәеи азинмчқәеи Аҧсны Аҳәынҭқарра Асоциалтә еиқәыршәареи адемографиатә политикеи рминистррахь аиагарала.
Аҧсны Аҳәынҭқарра Аҵара аминистрреи Аҳәынҭқарратә бызшәатә политиказы Аҧсны аҳәынҭқарратә еилаки реидҵарала Аҧсны Аҳәынҭқарра Аҵареи абызшәатә политикеи рминистрра еиҿкаахеит.