Фҩык Урыстәыла аҵара зҵоз, Аԥсныҟа ихынҳәыз астудентцәа акоронавирус рыдбалан. Дара иахьазы Гәдоуҭа ахәышәтәырҭаҿы ишьҭоуп. Урҭ руаӡәк иан, ажурналист Анна Гәниаԥҳа арадио Sputnik Аԥсны аинтервиу алҭеит.
Ачымазара ыҟаӡам, ари зегьы хыҭхәыцаауп ҳәа зҳәо срықәшаҳаҭым, ҳара ҳекспертцәам, ҳҳақьымцәам ус ҳҳәартә еиԥш. Доусы ихатә гәаанагара аниҳәо хәыҷык даахәыцроуп ҳәа азгәалҭеит ажурналист аиҿцәажәараан. Гәниаԥҳа иазгәалҭеит Гәдоуҭа зҽызхәышәтәуа ахәыҷқәа ахьаа шрымам атәы, ашәарагьы рҽарҭаӡом ҳәа ацылҵеит лара.
"Ҳҳақьымцәа ирылшо зегь ҟарҵоит. Саргьы дара сырзасуеит, даргьы уажәы-уажәы исзасуеит. Иара ачымзара ахәшәтәышьа атәы ҳҳәозар, егьырҭ Аԥсны анҭыҵ иҟоу аҳақьымцәа идсырдырит, анык лаҳасабала сгәы сырҭынчырцаз. Дара адырра сырҭеит уи шиашоу атәы. Москва ишырхәышәтәуа еиԥш ауп араҟагьы аус шцо. Ҳҳақьымцәа ҳаҵҳаҵуа, аҭаацәа ҳгәы дырӷәӷәоит. Иара Салмангьы (Анна Гәниаԥҳа лԥа - аред.) санизасуагьы, иаҳҿаччоит, ҳгәы дырӷәӷәоит, акраҳҿарҵоит ибзиан ҳәа сеиҳәоит. Ҳара Гәдоуҭатәи ахәышәтәырҭахь ҳамцеит, уа ҳаҟам. Ашәара аҟаҵара аҭахым ҳәа сыԥхьаӡоит, зегь раасҭа ихадоу - ахдырра ҳаманы, ҳхәыҷқәа акарантин аҿы ишыҟоу еилкааны, убрахьынтә иҭыҵны иҳаламлакәа, ачымазара ҳзыҵәахыр бзиахон. Ҳхәыҷқәа иааргеит, нас уаҳа ԥсыхәа ҳамамызт, иабаҳгоз арахь имаар, ҳхәыҷқәа роуп. Сара анык лаҳасабала иаҳа сгәы ҭынчуп ара дахьыҟоу. Москва еихьӡаӡом, уа ишырбои ара ишырбои еиԥшым. Уаҟа ачымазаар змоу ауаа иаҳа рацәоуп. Ҳхәыҷқәагьы ашәара рҽарҭаӡом, уа Москва иахьыҟаз излаԥшыз маҷым, уи аҟнытә ара рҽырҭынчны иҟоуп, алаф еибыҳәо раамҭа рхыргоит", - ҳәа еиҭалҳәеит Гәниаԥҳа.
Иаҳа инеиҵыху аиҿцәажәара шәазыӡырҩы арадио Sputnik Аԥсны аефир аҿы.
Акоронавирус иазку ажәабжьқәа зегьы шәрыԥхьар ҟалоит абра>>