АҞӘА, рашәара 16 - Sputnik. Аԥсни Урыстәылеи рҳәаа иахысуа атәылауаа рбиоматериал ргалоит аушьҭырҭатә ҭыԥ "Ԥсоу" аҿы COVID-19 рымазаара агәаҭаразы ҳәа аанацҳаит Агәабзиарахьчара аминистрра апресс-маҵзура абри аныҟәара ашьҭахь.
Абиоматериал ргалоит аҳәааҿ игылоу еиҭаҵуа амобилтә поликлиника алабораториаҿ, нас ареспубликатә баклабораториахь иаагахалоит. Аминистрцәа реицныҟәара хықәкны иаман аԥсуа-аурыс ҳәаа атәылауаа рахысра арежим ахылаԥшра аҭара.
Иазгәаҭоуп аҳәаахысра ахылаԥшра шарҭо Гагра ақалақь ахәышәтәырҭа хада, ареспублика асанитартә-епидемиологиатә маҵзура, Аԥсны АҶА амедицинатә усбарҭа рхаҭарнакцәа.
Агәаҭараан еилкаахеит ара иқәыргылоу атепловизор ашоура аныҟоу аус бзиан ишамуа, убри азы иара зыҩнагылоу ауада аҳауаҩнарсраз ауснагӡатәцҵақәа рыдкылахоит.
Иара убасгьы иӡбан еиҳа ахылаԥшра рыҭалазарц Урыстәылантәи Аԥсныҟа иаауа, хаҭала атранспорт ҷыдеи аидарамҩангага транспорти рырныҟәцаҩцәа.
Рашәара 12 рзы Аслан Бжьаниа аусдҵа инапы аҵаиҩит аԥсуа-аурыс ҳәаа аҳәаанырцәуаа рахысразы аԥкырақәа ԥхынгәы 1 аҟынӡа ишыҟоу иааныжьзарц.
Акоронавирус иадҳәалоу ажәабжьқәа зегьы шәрыԥхьар ҟалоит абра>>