АҞӘА, ԥхынгәы 10 - Sputnik. Аԥсны аиҳабыра агәаҭара-аушьҭратә ҭыԥ "Егры" аанартуеит Қырҭтәыла иҟоу Аԥсны ауааԥсыра рыдкыларазы, абри атәы аанацҳауеит Аҳәынҭқарратә шәарҭадаратә маҵзура асаит.
Адырраҭара ишаҳәо ала, "аамҭала Қырҭтәыла иҟоу Аԥсны атәылауааи иқәынхои рзы акоридор аадыртуеит анаҩсантәи арыцхә рзы:
- ԥхынгәы 13 - 15, 2020 шықәса рзы агәаҭара-аушьҭратә ҭыԥ "Егры" аартызаауеит асааҭ 9:00 инаркы 19:00 рҟынӡа аҭыԥантәи аамҭа инақәыршәаны;
- ԥхынгәы 16 - 17, 2020 шықәса рзы агәаҭара-аушьҭратә ҭыԥ "Егры" аартызаауеит асааҭ 9:00 инаркы 15:00 рҟынӡа аҭыԥантәи аамҭа инақәыршәаны.
Қырҭтәылантәи ихынҳәуа атәылауаа зегьы ргәабзиара аҭагылазаашьа аилкааразы амедицина-санитартә гәаҭара хымԥада иахысроуп".
Аҳәынҭқарратә ҳәаа ахысра ҟалоит анаҩстәи адокументқәа рымазаараан:
- ҳтәыла анҭыҵ ауаҩы ихаҿра шьақәзырӷәӷәо Аԥсны атәылауаҩ итәылауаҩшәҟәы;
- Аԥсны атәылауаҩ иҩнуҵҟатәи азеиԥшуаажәларратә тәылауаҩшәҟәы (2016 шықәсазтәи);
- Аԥсны аҵакыраҿы иааиԥмырҟьаӡакәа инхо аҳәаанырцә тәылауаҩ ма атәылауаҩра змам ахаҿы анхарҭа аиуразы ишәҟәы;
- Аԥсны Аҩнуҵҟатәи аусқәа рминистрра ирынаҭаз аформа №9 ала аилыркаага;
- 14 шықәса рҟынӡа зхыҵуа ахәыҷқәа ирымазароуп аиразы аршаҳаҭга.
Аҵыхәтәаны Қырҭтәылеи Аԥсни рҳәааҟны акоридор аартын рашәара 22 - 24 рзы. Усҟан аԥсуа-ақырҭуа ҳәаа иахысны Аԥсныҟа иааит 907-ҩык ауааԥсыра.