АҞӘА, цәыббра 3 – Sputnik, Асмаҭ Ҵәыџьԥҳа. Аԥсны Аҭҵаарадыррақәа ракадемиа иатәу Аҭҵаарадырратә институт адиректор Лиосик Аиба Аԥснынтәи Урыстәыла Аҭҵаарадыррақәа ракадемиа иалахәылахаз рахьтә даԥхьатәихеит.
"Асимволтә ҵак амоуп Аԥснынтәи Урыстәыла Аҭҵаарадыррақәа ракадемиа иалахәылахаз дахьраԥхьатәиу аграрии. Аԥсны аграртә тәылоуп, абри ахырхарҭала аҿиарақәагьы аԥеиԥш рымоуп. Лиосик Ианкәа-иԥа аграртә наукеи асубтропикатә культурақәеи рыҿиараҿы илагала дууп", - ҳәа иҳәеит РАН академик, урыстәылатәи аекономист, аекономикатә ҭҵаарадыррақәа рдоктор Владимир Баутин.
Аиба иколлега ҭабуп ҳәа еиҳәеит, иазгәеиҭеит Аԥсны Аҭҵаарадыррақәа ракадемиа иатәу Аҭҵаарадырратә институт аколлектив зегьы русура ишалшароу.
Лиосик Аиба - Аԥсны Аҭҵаарадыррақәа ракадемиа академик, ақыҭанхамҩатә ҭҵаарадыррақәа рдоктор, Темириазевтәи ақыҭанхамҩатә академиа апрофессор, аорден "Ахьӡ-Аԥша" II аҩаӡара ианашьоуп.
1985 шықәса рзы Аиба адиссертациа ихьчеит ("Биологическая и хозяйственная характеристика подвойных семенных форм персика в предгорьях Западного Кавказа" атемала). 2005 шықәса рзы адоктортә диссертациа ихьчеит ("Научное обоснование технологии производства плодов актинидии китайской (киви) в Абхазии" атемала).