АҞӘА, цәыббра 21 – Sputnik. Астратегиа командаҟаҵаратә-штабтә ҽазыҟаҵарақәа "Кавказ-2020" ирылагеит цәыббра 21 рзы ҳәа аанацҳауеит Аладатәи арратә округ апресс-маҵзура.
Аҽазыҟаҵарақәа ирылахәхоит Аԥсни егьырҭ атәылақәеи рыруаа, иазыԥхьагәаҭоуп атерроризм иаҿагыланы ақәԥара аус адулара. Астратегиа дҵаҟаҵаратә-штабтә ҽазыҟаҵарақәа "Кавказ-2020" мҩаԥгахоит цәыббра 21 - 26 рзы, Урыстәыла арратә мчрақәа Рыштаб хада аиҳабы, Атәылахьчара аминистр актәи ихаҭыԥуаҩ Валери Герасимов инапхгарала, Аладатәи арратә округ аполигонқәа – "Прудбой", "Ашулук", "Капустин Яр", "Арзгирский", "Копанской" рҟны. Уи адагьы Амшын еиқәеи Каспитәи амшыни ракваториақәа рҿы имҩаԥгахоит афлотилиақәа злахәу аепизодқәа.
"Хаз игоу ҽазыҟаҵарақәак мҩаԥгахоит Аԥсны Аҳәынҭқарра аполигонқәа Ҵабали Нагвалоуи, Ермантәылатәи аполигон Баграмиани, Аахыҵ Уаԥстәылатәи аполигон Дзарцеми рҿы", - ҳәа аҳәоит апресс-маҵзура адырраҭара.
Аҽазыҟаҵарақәа ҩ-етапкны имҩаԥгахоит. Актәи аан – арратә напхгара иазыԥхьагәарҭоит арра-политикатә ҭагылазаашьаҿы аҽазыҟаҵарақәа, аҩбатәи аан – амилаҭрацәатә ар ргәыԥ реицҽазыҟаҵарақәа.
Урыстәылатәи арратә округқәа рҟны масштаб ҭбаала аҽазыҟаҵарақәа мҩаԥыргоит ԥшьышықәса рахь знык. Уаанӡатәи аҽазыҟаҵарақәа "Кавказ" мҩаԥган 2016 шықәса рзы. 2017; 2018 шықәсқәа рзы – Мрагыларатәии Мраҭашәаратәии арратә округқәа рҿы, 2019 шықәсазы – Ацентртә арратә округ аҿы.
Урыстәыла атәылахьчара аминистр Сергеи Шоигу ишиҳәаз ала "Кавказ-2020" аҽазыҟаҵарақәа раан аус рыдулахоит "атерроризм аҿагыларазы аицуснагӡатәқәа" бу ШОС, ОДКБ, ИАР атәылақәа аус рыцура аҳәаақәа ирҭагӡаны.
Аҽазыҟаҵарақәа раан ахархәара арҭоит атехника ҿыц. Нанҳәамза анҵәамҭазы Кубинка имҩаԥысуаз афорум "Армия-2020" аан Шоигу ааглыхыҩцәа дразҵааит автомобиль "Тигри" автомобиль-амфибиа "Стрелеи" аибашьра иазааигәоу аҭагылазаашьақәа рыла рԥышәаразы ирзазырхиома ҳәа.
Ааглыхыҩцәа уи иақәшаҳаҭхеит. Уи ашьҭахь Арра-ааглыхратә еилахәыра адиректор хада Александр Красовицки иҳәеит акәылӡтәы машьына "Стрела" аԥышәара ишахысуа. Уи адагьы акәылӡтәы машьына "Атлет" ("Тигр" ахкқәа), ахықәкырацәалатә кәылӡтәы машьынақәа "ВПК-Урал", "Тигр" "багги" акомплектациала аманиоврқәа рахь ишынашьҭхо рҳәеит.
Апрактикатә ҽазыҟаҵарақәа ирыдыԥхьалахоит 80 000-ҩык аруаа. Аполигонқәа рахь инагахоит 250 танк, 450 аршьаҟауаа рмашьынақәа, акәылӡтәы транспортиорқәа, 200 артиллериатә системеи ареактивтә системақәеи.