АҞӘА, жьҭаара 23-Sputnik. Аушьҭырҭатә ҭыԥ "Адлер" аҿы Урыстәыла АШәМ Краснодартәи атәылаҿацә аҿтәи амаҵзура аусзуҩцәеи аҳазалхыҩц́еи иааныркылеит аҭҭын аалыҵ аконтрабанда. Абри атәы аанацҳауеит Шәачатәи аҳазалхырҭа апресс-маҵзура.
Аҟазауаа-кинологцәа алархәны аҳазалхратә гәаҭараан иаанкылан аидарамҩангага фургон Foton. Амашьына Аԥснынтәи амҩа иқәын. Аԥсҟы икын 44-шықәса зхыҵуаз Краснодартәи атәылаҿацә ауаҩԥсы. Иара агәаҭара иахыжьын амобил инспекциа-гәаҭаратә комплекс (МИДК) ахархәарала. Агәаҭарақәа иаадырԥшит автомашьына аконструкциа иақәымшәоз аиқәараҭыԥқәа.
Ишьақәыргылан амашьына акузов иаакәыршаны абжьы узмырҳауа апластинақәа рыла иҭаӡны ишыҟаз. Ҩба-ҩбала иҟаз абортқәа анықәырга ашьҭахь ирыԥшааит аҭуан иаҵаҵәахыз аҭаҭын аалыҵ, асигаретқәа "Continent superslims".
Зынӡа афургон иҭыган 2560 ҭоԥ (25600 пачка, 512 000 цыра) асигарет акцизтә маркақәа рықәгыламкәа ҳәа аанацҳауеит Шәачатәи аҳазалхырҭа апресс-маҵзура.
Аконтрабандатә аалыҵ изгоз имхуп, аекспертизахь инашьҭуп. Уи алкаақәа инарықәыршәаны ишьақәыргылахоит аалыҵ аџьармыкьатә хәыԥса.
Аусҭҵааратә уснагӡатәқәа мҩаԥысуеит.
Иара убас шәаԥхьар ҟалоит: