АҞӘА, абҵара 5 – Sputnik. Гәдоуҭа аҳақьым лцәа аԥҽра аҽазышәара аҭыԥ аман ҳәа азинхьчаратә усбарҭақәа рахь арзаҳал ыҟам ҳәа Sputnik иазаарыцҳаит Апрокуратура хада апресс-маҵзураҟынтәи.
"Гәдоуҭа араион апрокуратура асоциалтә ҳақәа рыла ирыларҵәоу аинформациа аиашареи аиашамреи рзы аусҭҵаара иаҿуп", - рҳәеит аусбарҭаҿы.
Уаанӡа Урыстәыла Ацҳаражәҳәарҭа иҭнаҵаауеит Гәдоуҭатәи агоспиталь ахь цхыраара ҳәа иааз урыстәылатәи аҳақьым лцәа аԥҽра аҽазышәара ыҟан ҳәа ирыларҵәоу аинформациа ҳәа адырра ҟаҵан.
Екатеринбургнтәи Гәдоуҭатәи ахәышәәтырҭахь иааз аҳақьымцәа ахҭыс ахҳәаа аҭара мап ацәыркит. Sputnik акорреспондент дзыҿцәажәаз аҳақьым-реаниматолог Виачеслав Кузьмин иажәақәа рыла дара рус нарыгӡоит.
Гәдоуҭа араион ахада ихаҭыԥуаҩ Ҭемыр Возба Гәдоуҭатәи агоспиталь ахь цхыраара ҳәа иааз аҳақьым лцәа аԥҽра иҽазишәеит ҳәа аинформациа рылаҵәеит асоциалтә ҳақәа рҿы абҵара 4 рзы.
Иара убасгьы иҳәан аҭыԥҳа абналара лылшеит, Аԥсны иҟоу Урыстәыла Ацҳаражәҳәарҭахь днеиит ҳәа. Ахара здырҵо иԥшаара иашьҭоуп ҳәа.